Figlio d´e vicule

Io dint’ ‘e viche ‘e Napule so’ nnato
addò libere vanno suone e voce,
e spazio senza fine
trovano ‘e sentimente
ca ‘a dint’ ‘e core ‘e ll’uommene
traseno e ghiesceno
mmiscannose cu ‘e llacreme e ‘e surrise
‘e na iurnata addò ‘a carnalità
riesce sempe a dda’
a ll’esistenza, pure ‘a cchiù difficile,
mumente ‘e gioia.
Io figlio so’ ‘e stu vico
addò
‘o tiempo pare
ca maie nun passa o passa troppo ampressa,
ma addò è nu tiempo ca t’è sempe amico.
Llà, int’a sti viche luonghe, stritte, cupe
io songo nato,
llà, int’a sti viche, addò si ‘o sole è raro
rara nun è
‘a luce ca int’a ll’uocchie tene ‘a gente,
gente cumpagna,
gente ca sape
‘e te ogni cosa
e tu ‘e ‘sta gente tutte ‘e ccose saie.
Llà songo nato, llà, int’ ‘e viche addò
ognuno
sparte ccu ll’ate
penziere e suonne,
iurnate ‘e fantasia
e tiempe senza genio.
Llà songo nato, dint’ ‘a chisti vicule,
addò te puo’ sentì pezzente o rre,
nu primm’attore o na cumparza ‘e niente,
ma addò tutte ‘e mumente
te siente ca tu si’, ca ancora si’,
e ancora tu appartiene a’ vita e a’ gente.