A nu viaggiatore

Che t’è piaciuto ‘e cchiù d’ ‘a terra mia?
Tutto? Ogni cosa? Dimme ‘a verità,
te l’aspettave ch’era accussi bella?
L’he’ vista, ‘e notte, ‘a coppa San Martino,
quanno ogni cosa dorme, quanno ‘a luna,
cantannole canzone, l’arricorda
ca ‘e ll’universo sano era ‘a riggina?
E d’ ‘ammuina
d’ ‘e vicule e d’ ‘e strade, che me dice?
Nun so’ na gioia ‘e mmille e mmille voce
d’ ‘o popolo ca è schiavo e ca è padrone,
ca spisso tira nnanze a bbotte ‘e stiente
e fa cuntinuamente
iuoche ‘e prestiggio pe’ nu muorzo ‘e pane?
Nun è na meraviglia chesta gente
ca mmesca nzieme lacreme e poesia?
‘Sta gente antica e nova,
gnurante e tutta scienza,
ca ‘a sempe, ‘a quant’è nnata,
è ghiuta a’ scola d’ ‘a supravvivenza?
Di’ ‘a verità,
quale città d’ ‘o munno sape da’
chello ca te dà Napule?
E ‘e quala terra, ‘e quala atu paese
se pò parlà comme d’ ‘a terra mia?
Na terra addò se mmesca ‘o mmeglio e ‘o ppeggio.
Na terra, ‘a sola terra canusciuta,
ca è vergine e puttana,
ca è verità e buscia,
nemica e amica,
amata e odiata, santa e delinquente,
ca pure quanno ha avuto curtellate
ha ditto sempe: fìglìemo è nnucente!
Na terra tutta na cuntraddizione,
ma forse ‘a sola, l’unica capace
‘e piglià ‘e faccia e vèncere
‘e nzirie ‘e nu destino amaro e strano,
‘e nzirie ‘e nu destino
ca nun l’è stato maie cumpagno, maie!