´A madonna d´o vico

‘O vico: case e case
una ‘e rimpetto a ll’ata,
se toccano quase.
Vasce: ce sta ‘o cchiù bello
cu ‘a porta nova e ‘o rampicante fora,
ce sta chillo nu poco trascurato
cu ‘a ncartata nzevata e ‘o succïelo
tignuto ‘e fummo.
Puteche:
‘a chianca, ‘o casadduoglio, ‘o canteniere,
‘o coloniale,
‘o cusetore,
nu barbiere.
A ‘o puntone ‘e stu vico, ‘nfacci’ ‘o muro,
ce sta pittata na Madonna, tene
na cappelluccia attuorno
fatta cu cinche lastre.
È nu ritratto semplice,
opera ‘e prencepiante,
senza pretese.
Annanz’a ‘sta Madonna
nun s’è maie ditta ‘a messa,
e maie ce hanno purtato vute ‘argiento,
però
Essa è ‘a cchiù ricca d’ ‘e Madonne ‘e Napule
pecché maie Le manca
‘a luce ‘e nu lumino,
l’addore ‘e nu carofano,
‘a devuzione
‘e tutto quanto ‘o vico
ca Le cunfida
pene annascoste,
ca L’addimanna pace, ca L’affida
nu pate ‘e figlie
ca se cunzuma dint’a nu spitale,
ca Le riala,
cu palpite sincere,
vase e carezze,
lacreme e preghiere.