Primma matina

Ancora tutto dorme.
Ancora tutto è pace.
Primma matina. Napule.
St’ora quanto me piace.

St’ora addò tutto cosa
se veste ‘e nu culore
ch’è antico e nuovo nzieme,
ca mette dint’ ‘o core

cchiù genio ‘e vita, e tutto
piglia cchiù spazio, tene
spazio na rosa, spazio
l’ommo, ‘o penziero. ‘E ppene

so’ cchiù liggere. Napule
schiava nun è d’ ‘o mmale
ca ‘a dint’ a ll’uocchie ‘a scippa
‘e suonne suoie carnale,

e schiava nun è ancora
d’ ‘o regno ‘e ll’anarchia,
ancora, pe’ nu poco,
è tutta n’armunia

mo ch’ogni cosa dorme,
mo ch’ogni posto è pace.
Primma matina. Napule.
St’ora quanto me piace.