Si´ tu ´o guardiano

Na vota
tutte ‘e penziere mieie, tutte ‘e speranze,
scelle tenevano
ca s’ ‘e ppurtavano
pe’ ddo’ vulevano
c’ ‘o risultato, po’, ca tutte cose
me mbriacava sulamente, senza
me fa’ sentì
priato overamente.
Mo,
d’ogni speranza mia, d’ogni penziero,
si’ Tu ‘o guardiano,
si’ Tu ‘o padrone,
si’ Tu
ca cchiù d’ogni ata cosa
me daie priezza.
E i’ cu na gioia, cu na pace maie,
maie e po’ maie pruvata accussì forte,
a Te m’affido, tuttuquanto a Te,
senza desiderà cchiù cose fàuze,
senza paura
né cchiù d’ ‘a vita,
né cchiù d’ ‘a morte.

• < Indietro
• Avanti >