Na chiesia abbandunata. Bona parte
d’ ‘e mmure, sgarrupate. Addò nu scanno
scancariato,
addò
na seggia zoppa.
‘E llastre, chi scassata
e chi affucata da ‘e ffelinie. ‘N terra
chello ca resta ‘e tutto ‘o pavimento
abballa sott’ ‘e piede. Attuorno attuorno
ùmmedo e piezze ‘e tonaca caduta.
Niente rummane d’ ‘a pittura: l’acqua
da ‘o titto nfracetato
tutto ha distrutto. ‘O gelo ha ntesecuto
‘a vita d’ogni cosa. Tutto cose
‘o tiempo ha cunzumato.
Llà, però,
‘ncap’a ll’altare
ce sta na croce.
Na croce, ancora, llà,
‘ncap’a ll’altare.
Na croce, llà.
Tutto ‘o mistero suio. Tutta ‘a speranza.