Io dico sempe ca te voglio bene
ma nu vestito ‘acciaro maie te faccio
pe’ Te salvà da ‘e pprete ca Te vottano.
Io cerco ‘o sciato Tuio pe’ fa’ ‘e ‘sta vita
na vita overa
e po’ me faccio
vèncere ‘a suonne fauze.
Io cu ‘e penziere mieie
Te voglio da’ ogni cosa ‘e st’esistenza
e po’
me perdo si Tu appena
me cirche ‘a cchiù liggera penitenza.
Ma proprio dinto a sti mumente nire
ca cchiù me vedono attaccato a’ terra
Tu
stamme vicino.
‘A forza voglio, ‘a forza
io pure pe’ purtà
‘a croce ca m’è stata destinata.
Tu ca he’ purtato
‘a croce d’ ‘e peccate ‘e tutto ‘o munno,
stamme vicino.