Gocce

Cadono gocce d’acqua, e int’ ‘o silenzio
quase ‘e sentì me pare
note ‘e na musica
ca, bella e scanusciuta,
trase ‘a sti llastre arricamate ‘e perle.
Chi s’ ‘o ccredeva
ca doppo na iurnata tutta ‘e «no»,
dint’ ‘a serata, mo,
‘a voce ‘argiento ‘e stu tappeto ‘e nuvole
veneva a farme cumpagnia. Sincera
è ‘sta canzone d’acqua ca stasera
se piglia ogni penziero e ‘o porta addò
nun è malincunia,
addò, pure pe’ mme,
ce sta na via
pittata rosa.
E ‘sta fenesta aggio araputa. ‘A mano
cu ‘e ggocce ‘e st’acqua
io me so’ nfosa…
lieggio aggio ntiso subbeto ‘o calore
‘e na carezza,
e ‘n miez’ ‘e ddeta
cumpagno m’è rrummaso
tutto ‘o prufumo doce ‘e nu surriso.