Catenassisi

Pareva già oramaie tutto signato,
già i’ me credevo
ca ‘e iuoche erano fatte, ch’ogni cosa
s’era stabilizzata, e invece, tècchete,
a ll’intrasatta tu me trase dinto
comm’a nu lampo ‘e fuoco,
e me faie schiavo,
e io, pe’ tte,
aggio traduto Napule e Afragola.
Arme e bagaglie e so’ partuto. ‘O ‘i ccà,
tutto d’ ‘o tuio mo songo. Certo, sempe,
io penzo ‘a terra mia bella e luntana,
però me fermo ccà, int’ ‘e bbraccia toie,
e dint’ ‘e bbraccia toie io m’abbandono
comme nu criaturiello s’abbandona
cercanno ammore nzin’a mmamma soia.
Assisi, Assisi santa, Assisi amata,
si’ overa o si’ nu suonno?
Faie parte ‘e chistu munno
o tu
si’ na diapositiva ca ‘o Signore
pruietta ncopp’a stu lenzulo ‘e cielo
direttamente ‘a dint’ ‘o Paraviso?
Io nun t’ ‘o ssaccio di’, saccio sultanto
ca tu m’he’ ncatenato comme niente
è stato maie capace,
m’he’ ncatenato,
e io te benedico.