È piccerella ‘a casa mia pe’ Te;
strette so’ ‘e ggrare e meze sgarrupate;
na fenestella stremenzita assaie,
poco cchiù grossa ‘e nu pertuso, penza
ca manco ‘o sole ‘a tene ‘n simpatia
e maie ‘a vasa cu nu raggio d’oro.
È piccerella ‘a casa mia pe’ Te
e puveriello è stu patrone ‘e casa,
ma na cuperta ‘e raso antica e bella
dint’ ‘o stipone tengo bona nchiusa
e si aggio ‘a grazia ca nu iuorno ‘e chiste
saglie sti ggrare sgarrupate e strette
e viene a tuzzulià ‘nfaccia a ‘sta porta,
io, primma ‘e T’arapì, ‘a int’ ‘o stipone
caccio ‘a cuperta ‘e raso e pe’ tappeto
T’ ‘a metto sott’ ‘e piede.