Preghiere 7

Io nun Te cerco dinto ‘e core amante
‘e perle rare,
‘e diamante,
‘e gloria;
io nun Te cerco dint’ ‘e ppreputenze,
né dint’ ‘a mmidia, ‘a vanità, ‘a superbia;
io nun Te cerco
dint’ ‘a fauzaria,
né int’ ‘e castielle, né dint’ ‘a ricchezza,
Te cerco, invece, int’ ‘a semplicità,
dint’ ‘e suonne d’ammore;
Te cerco dint’ ‘o triemmolo d’ ‘e stelle,
dint’ ‘o chiarore pallido d’ ‘a luna,
dint’ ‘a rassignazione
d’ ‘a gente scamazzata,
dint’ ‘a felicità ‘e chi s’accuntenta;
Te cerco dint’ ‘e vvarche
d’ ‘e piscature,
dint’ ‘o culore tennero d’ ‘e sciure,
dint’ ‘a sincerità d’ ‘e core buone;
Te cerco dint’ ‘e viche,
dint’ ‘a malincunia d’ ‘e vasce cupe;
Te cerco dint’ ‘e core ‘e tutte ‘e mmamme;
Te cerco dint’ ‘e vvoce d’ ‘e ccriature,
dint’ ‘e surrise, int’ ‘e speranze lloro,
e llà Te trovo.