France´

Chesti poesie d’ammore
nun so’ parole, so’ penziere ‘e sole
ca ‘a dint’a ll’uocchie doce ca tu tiene
pigliano luce
e dint”e tratte appassiunate tuoie
trovano tutt”o bene
ca genio ‘e vita dà a ‘sta vita stanca.
Chesti poesie d’ammore
so’ gocce ‘e luna int’a na notte cupa,
songo acqua chiara dint’a nu deserto,
songo ‘e surrise ‘e n’angelo
ca stelletelle culurate mette
dint’a nu cielo ‘e chiummo.
Chesti poesie d’ammore
ca tu, France’, ‘a tant’anne me faie scrivere,
fanno ‘e stu core ca nun era niente
‘a cònnola ‘e nu suonno,
fanno d”o gelo ca me turmentava
na primmavera nova,
e chesta primmavera
fa ‘e na speranza antica na certezza.